ദുരന്തങ്ങളും , സങ്കടങ്ങളും വിറ്റ് പണമുണ്ടാക്കുന്ന ഒരു ടെലിവിഷന് ചാനലിന്റെ പുതിയ എപ്പിസോഡിന്റെ ചിത്രീകരണ വേദി.. സ്ഥലം ഒരു വൃദ്ധസദനം..!
മുഖത്ത് തേച്ചുപിടിപ്പിച്ച മേയ്ക്കപ്പിനും , ചുണ്ടില് പൂശിയ ചായത്തിനും ഭംഗം വരുത്താതെ ഇടയ്ക്കിടെ പൊഴിക്കുന്ന സങ്കടക്കണ്ണീരിനെ തൂവാലകൊണ്ട് ഒപ്പിയെടുത്തു ഓരോ അന്തേവാസികളോടും അവരുടെ ദുരന്തകഥകള് പറയിപ്പിച്ചു അവതാരിക തന്റെ ജോലി ഭംഗിയായി നിര്വ്വഹിക്കുന്നു..!
അടുത്തത് അയാളുടെ ഊഴമായിരുന്നു..
മെലിഞ്ഞുണങ്ങിയ ആ കോലം കേമറക്കണ്ണുകള് നന്നായി ഒപ്പിയെടുത്തു..
ചിരിച്ചു കൈകൂപ്പി വന്ന അവതാരിക പെട്ടെന്ന് മുഖത്ത് സങ്കടം വരുത്തിത്തീര്ത്തു അയാളോട് ചോദിച്ചു..
"അച്ഛന് ഇവിടെയെത്തിയിട്ട് ഒത്തിരികാലമായോ?"
"അതേ മോളെ.. ഞാന് ഒരുകൊല്ലം കഴിഞ്ഞു."
അയാളുടെ സങ്കടത്തിന്റെ അണപൊട്ടിയൊഴുകി.
"അച്ഛന് ആരൊക്കെയുണ്ട് "
"എനിക്ക് എല്ലാരുമുണ്ട് മോളേ.. എന്നിട്ടും ഞാന് ആരുമില്ലാത്തോനായി.."
അയാള് മൂക്കുചീറ്റി മുണ്ടില് തുടച്ചുകൊണ്ട് അടുത്ത ചോദ്യത്തിനായി അവതാരികയുടെ മുഖത്തേക്ക് നോക്കി..
"ഇവിടെ അച്ഛന് സുഖമല്ലേ..?
"അതെ.. മോളെ.. എനിക്ക് ഇവിടെ ഒരു കുറവുമില്ല.."
അവതാരിക അറച്ചറച്ചു അയാളുടെ മുഖത്ത് തടവിയെന്നുവരുത്തിക്കൊണ്ട് സമാധാനിപ്പിച്ചു പറഞ്ഞു ..
"അച്ഛന്റെ വിഷമം മക്കള് കാണും .. അവര് അച്ഛനെ തിരികെ കൊണ്ടുപോകും.."
അയാള് അനുസരണയുള്ള കുട്ടിയെപോലെ തലയാട്ടി അവതാരികക്ക് ഉത്തരം കൊടുത്തു .
************************************************
ഒരു ഫ്ലാഷ് ബാക്ക് ..
ദിനവും മദ്യപിച്ചു ലക്കുകെട്ട് ഭാര്യയുമായി വഴക്കിടുന്ന അയാള്..
അയാളുടെ ഇടിയും തൊഴിയും ഏറ്റുവാങ്ങി ജീവിതം തള്ളിനീക്കുന്ന അയാളുടെ ഭാര്യ പറക്കമുറ്റാത്ത മൂന്നു കുഞ്ഞുങ്ങളെയും വാരിപ്പുണര്ന്നു തന്റെ ദുര്വിധിയോര്ത്ത് നെടുവീര്പ്പിട്ടു..
കുടുമ്പക്കാരുടെയും അയല്ക്കാരുടെയും വെറുപ്പ് വേണ്ടുവോളം സമ്പാദിച്ച അയാള് ഒരുമാറ്റവുമില്ലാതെ വര്ഷങ്ങള് തള്ളിനീക്കി ..!
തന്റെ യൌവനമത്രയും ഭര്ത്താവിനും മക്കള്ക്കും വേണ്ടി ചെലവഴിച്ച അയാളുടെ ഭാര്യ ആയുസ്സോടുങ്ങാതെ മരണത്തെ പുല്കി..!
ബന്ധുക്കളുടെ സംരക്ഷണത്തില് വളര്ന്ന കുട്ടികള് മിടുക്കരായി സമൂഹത്തില് വളര്ന്നു .
അയാള് അപ്പോഴും തന്റെ ജീവിത ശൈലിയില് മാറ്റം വരുത്താതെ മുന്നോട്ടുപോയി..!
മക്കളുടെ മനസ്സില് വേണ്ടുവോളം വെറുപ്പ് അയാള് തന്നെ കോരിയിട്ടു ..
മക്കളുടെ സന്തോഷം നിറഞ്ഞ കുടുമ്പ ജീവിതത്തിനു അനുവദിക്കാതെ വന്നപ്പോള് അയാള് തെരുവിലെറിയപ്പെട്ടു ..!
**********************************************
തീന് മേശക്കരികിലെ ടെലിവിഷനില് അയാളുടെ ദയനീയത മലയാളികള് വേണ്ടുവോളം ആസ്വദിച്ചു . ഒത്തിരിപേരുടെ ശാപവാക്കുകള് ഏറ്റുവാങ്ങിയ അയാളുടെ മക്കളുടെ മനസ്സില് അയാളുടെ മുഖം വെറുപ്പിന്റെ കൊടുമുടി കയറിയിരുന്നു..!
No comments:
Post a Comment